Programa de redución de accidentes in itinere e in mision
Que é o accidente in itinere?
O accidente in itinere é o que sofre o traballador ao ir ou volver do traballo. Ten que cumprir os seguintes requisitos:
- Que ocorra no camiño de ida ou volta entre o domicilio e o centro de traballo.
- Que o dito traslado sexa motivado exclusivamente polo traballo, é dicir, ao ir ou volver.
- Que se empregue o itinerario habitual, así como un medio de transporte convencional e axeitado á distancia.
- Que o tempo sexa razoable, próximo á hora de entrada ou saída.
Que é o accidente in mision?
É o sufrido no traxecto que o traballador ten que realizar para o cumprimento da misión, así como os acontecidos no desempeño desta dentro da súa xornada laboral.
É habitual en traballadores que realizan con frecuencia actividades que requiren o desprazamento durante a súa xornada de traballo (reunións comerciais ou de traballo, servizos noutras empresas, etc.).
Causas da sinistralidade
Polo tipo de desprazamento
Por exemplo: coche, moto, bicicleta, autobús de transporte colectivo público ou de empresa, patíns, a pé, etc.
O índice de frecuencia de accidente (accidentes/millón de km percorrido) é moi diferente segundo o xeito de desprazamento elixido. O máis seguro é o transporte público e en concreto o autobús; o seguinte modo de desprazamento máis seguro é o coche; sendo os máis inseguros a bicicleta e a moto.
Frecuencia do desprazamento
Hai traballadores que, dependendo das características do traballo, teñen que realizar unha, dúas ou varias viaxes nun día: a ida e volta ao traballo xeral, desprazamento para comer, rutas, etc.
Duración e distancia do desprazamento
Outro factor que inflúe na probabilidade de sufrir un accidente de traballo in itinere é o tempo que un traballador emprega en percorrer a distancia desde o seu lugar de residencia ao traballo e as características do devandito percorrido. Segundo a situación do punto de saída e de destino, os riscos son cuantitativa e cualitativamente distintos.
Condicións ambientais
Por exemplo: chuvia, neve, xeo, néboa, vento, etc.
Pódese considerar que as condicións climatolóxicas adversas supoñen un factor negativo para a condución e incrementan o número de accidentes.
A respecto disto, un dato significativo é que, de acordo coa Dirección Xeral de Tráfico, o 10% dos feridos e mortos por accidente de tráfico danse en condicións de clima adversas.
Tipo e estado da vía
Por exemplo: autoestrada, autovía, estrada, estrada de circunvalación, etc.
Ademais do tipo de vía polo que ten que circular o traballador na ida e volta do seu fogar ao traballo, hai que ter en conta a accesibilidade aos centros de traballo ou os plans de urbanismo dos arredores da obra. Neste caso, os traballadores poderían recibir información sobre as posibilidades de rutas e percorridos alternativos dispoñibles para desprazarse ao seu centro de traballo.
Un plan de acción áxil, coherente e profesional
O plan de acción estrutúrase en diferentes fases para maximizar a súa eficacia e retorno:
- Análise previa da sinistralidade
O noso técnico de prevención elabora un informe de sinistralidade en que analiza o volume e tipo de accidentes e enfermidades profesionais. - Visita á empresa
Concértase unha reunión co interlocutor da empresa para explicarlle o diagnóstico inicial e a proposta de colaboración para a redución da sinistralidade. - Diagnóstico de puntos críticos e elaboración do programa de acción
O noso técnico de prevención analiza en profundidade os motivos e factores que inflúen na sinistralidade, elabora un diagnóstico e propón un plan de acción que cobre un período de entre 12 e 24 meses.
O plan de redución de accidentes de tráfico inclúe unha definición de obxectivos, selección de medidas que se deben implantar, planificación actividades, estratexia de difusión e sensibilización.
Os contidos deste programa poden incluír accións como:
- Elaboración e aplicación dun plan de mobilidade
- Campañas de sensibilización sobre: seguridade viaria, mobilidade
- Achega de materiais de apoio á sensibilización: carteis, manuais, folletos
- Actividades que ten que desenvolver a empresa
Todas as actividades previstas na Lei de prevención de riscos laborais como responsabilidade empresarial son desenvolvidas pola empresa a través da modalidade organizativa de prevención de riscos laborais que esta adoptase. - Posta en marcha do programa
Desenvolvemento de accións e seguimento en reunións periódicas. - Asesoramento permanente
O noso técnico de prevención asesora en todo momento os responsables da empresa sobre calquera aspecto do plan e da evolución da sinistralidade.