Prórroga das medidas extraordinarias da Seguridade Social para traballadores autónomos afectados pola erupción volcánica da illa da Palma (artigo 176 do Real decreto-lei 5/2023, do 28 de xuño)

Prestación de cesamento de actividade para os traballadores autónomos que se viron obrigados a cesar na actividade como consecuencia directa da erupción volcánica rexistrada na zona de Cimeira Vella da Palma

1. Desde o 1 de xaneiro de 2024, os traballadores autónomos que viñesen percibindo o 31 de decembro de 2023 as prestacións por cesamento de actividade como consecuencia directa da erupción volcánica rexistrada na zona de Cimeira Vella da Palma, prevista no apartado un do artigo 176 do Real decreto-lei 5/2023, do 28 de xuño, polo que se adoptan e prorrogan determinadas medidas de resposta ás consecuencias económicas e sociais da Guerra de Ucraína, de apoio á reconstrución da illa da Palma e a outras situacións de vulnerabilidade; de transposición de directivas da Unión Europea en materia de modificacións estruturais de sociedades mercantís e conciliación da vida familiar e a vida profesional dos proxenitores e os coidadores; e de execución e cumprimento do Dereito da Unión Europea; seguirán percibindoas, sen que se computen, para os efectos de consumir os períodos máximos de percepción establecida, os seis meses de prestación de cesamento de actividade prevista neste apartado. Considerarase como cumprido, aos efectos de poder acceder a estas prestacións por cesamento de actividade, o requisito de cotización, previsto no artigo 338 do texto refundido da Lei Xeral da Seguridade Social, aprobado polo Real decreto Lexislativo 8/2015, do 30 de outubro.
2. Estas prestacións por cesamento de actividade poderán comezar a devengarse con efectos do 1 de xaneiro de 2024 e terán unha duración máxima de seis meses, sempre que a solicitude se presente dentro dos primeiros vinte e un días naturais seguintes á entrada en vigor desta norma. En caso contrario, os efectos quedan fixados no primeiro día do mes seguinte ao da presentación da solicitude. A duración destas prestacións non poderá exceder do 30 de xuño de 2024.