Gaixotasuna goiz detektatzea garrantzitsua da hori arrakastaz tratatzeko. Diagnostiko eta tratamendu onerako beharrezko informazioa historia klinikoaren, miaketa fisikoaren eta miaketa osagarrien bidez lortzen da.
- Historia klinikoa. Pertsona bat bere lehenengo bisitara joaten denean baheketa programaren ondorioz eratorritako sintoma edo minen bat duelako, medikuak, edozein froga egin aurretik, galdera asko egingo dizkio, lotura dutenak bere osasunarekin, aurreko gaixotasunekin, bere familiarren gaixotasunekin eta bizimodu jakin batzuekin; esaterako, ohitura dietetikoak, lan-egoera, tabakoaren eta alkoholaren kontsumoa, eta abar. Gainera, medikuek hainbat galdera egiten dituzte, adibidez: nola zaude edo zer gertatzen zaizu? hau da, dituzun sintomengatik galdetzen dizute eta nola eragiten dizuten horiek zure eguneroko bizitzan (sintoma kopurua, sintoma nagusia, sintomarekin duzun denbora, noiz eta nola hasi zen, zer den sintomak areagotzen dituena eta zer hobetzen dituen, besteak beste).
- Miaketa fisikoa. Gorputzaren azterketa zuzenean oinarritzen da, auskultazioa, haztapena, perkusioa eta behaketa erabiliz gaixotasunaren seinaleak identifikatzeko. Miaketaren emaitzaren eta diagnostiko posibleen arabera, medikuak proba sorta bat egitea proposatuko du, beharrezkoa bada.
- Miaketa edo froga osagarriak. Elkarrizketaren eta miaketa fisikoaren inguruan medikuak egiten duen balorazioaren arabera, beharrezkoak diren probak eskatuko ditu diagnostiko jakin bat egin, baieztatu edo baztertzeko eta tratamendu egokiena finkatzeko.